சிரிப்பு வருது

சிரிப்பு வருது

எங்கள் ஊரில் பைத்தியக்காரர்களின்
எண்ணிக்கை நாள்தோறும் பெருகுகிறது

சாலை சந்திப்புகளில்
சிக்னலிற்கு காத்திருக்கும்போது
ஏதாவது ஒரு பைத்தியத்தை
எதிர்கொள்ளாமல் இருந்ததில்லை

இன்னும் ‌சில பைத்தியங்கள்
காதில் ஏதோ மாட்டியபடி
தனக்குத்தானே பேசியபடியும்
வண்டியோட்டியபடியும் சிரித்தபடியும்

அலுவலகத்தில் சக பைத்தியமொன்று
நொடிக்கொருதரம் பங்குச்சந்தை
செய்திகளை வாசிக்கும்

இன்னொரு பைத்தியம்
காப்பீட்டு திட்டங்கள் பற்றி
நாள் முழுதும் பேசிக்கொண்டிருக்கும்

நேற்று ஒருவர் வீட்டுக்கு வந்திருந்தார்
அவருக்கு ஓட்டு போட்டால்
அடு‌த்த வருடமே
ஊரை சொர்க்கமாக்கி விடுவதாக
உறுதியளித்தார்
விடாமல் சிரித்துக்கொண்டிருக்கிறேன்.